Хүүхэд байхаасаа ном уншихад шимтэж, үр өгөөжийг нь амьдралдаа хүртсээр ирсэн миний хувьд "Хамтдаа уншицгаая" төсөл нь сэтгэлд минь маш ойр төдийгүй, сангийн маань зорилготой нягт уялдсан гайхалтай санаачилга юм. Энэхүү төслийн ачаар олон хүүхэд номд хайртай хүн болж өсөөсэй гэж найдаж байна.

0-5 насны хүүхдийн хөгжлийг номоор дамжуулан дэмжих боломжтойг олон судалгаанууд нотолсон байдаг. Хүүхдийн насны онцлогт нь тохирсон номыг тогтмол уншиж өгөх нь тэдгээрийн хэл яриа, танин мэдэхүйн хөгжлийг дэмжихээс гадна аав, ээжтэйгээ эерэг, дотно харилцаа бий болгох зэрэг олон давуу талтай юм.

Би асран хамгаалагч хүүхэдтэйгээ өнгөрүүлж буй цагийн үнэ цэнэ болон номын хүчид итгэдэг. Нийгмийн шинжлэх ухаанд бага насны хүүхдэд ном уншиж өгөхийн эерэг үр нөлөөг маш сайн тайлбарласан байдаг боловч хүмүүс ихэвчлэн мэддэггүй байна. Энэхүү Хамтдаа Уншицгаая төсөл маань хүүхдийг багаас нь номтой нөхөрлүүлэх, гэр бүлээрээ цагийг хамтдаа өнгөрүүлэх, хүүхдийг аз жаргал, ирээдүйнх амжилтад хөтлөхөд нь туслах зорилготой юм.

Эцэг эх, асран хамгаалагчид бид хүүхдэдээ багаас нь тогтмол ном уншиж өгснөөр хүүхдийнхээ ирээдүйн амжилтын үндэс суурийг тавих бөгөөд энэ нь олон судалгаагаар нотлогдсон байдаг. Миний хувьд хүүхэдтэйгээ хамтдаа ном унших мөч бүхэн надад болон хүүхдэд маань сайхан дурсамж, үнэ цэнийг бүтээдэг бөгөөд энэхүү төсөл маань олон гэр бүл хүүхдүүдэд хүрч, олон хүүхэд номтой багаасаа нөхөрлөхийн үр шимийг хүртээсэй гэж хүсэж байна.

Ном бол ертөнцийг харах цонх гэдэгчлэн хүүхдээ багаас нь номтой ойр өсгөснөөр сууж сурах, аливааг олон өнцгөөс харах, сониуч, бүтээлч сэтгэлгээ, мөрөөдөх чадвартай болох, өөрийгөө чөлөөтэй илэрхийлж сурах гээд хувь хүний хөгжил, төлөвшилд нь эергээр нөлөөлөх олон давуу талтай. Эцэг эх, асран хамгаалагчид хүүхэдтэйгээ харилцан ярилцаж, шинийг ойлгуулах, анхаарлаа бүрэн хандуулах нандин цаг өнгөрүүлэхдээ номыг арга хэрэгслээ болгон ашигладаг байгаасай

Ээж аавын уншиж өгдөг үлгэрүүд, үлгэрт гардаг баатрууд, адал явдлууд, харилцан яриа бүгд хүнийг бий болгоход, төлөвшиж хэлбэржихэд ихээхэн нөлөөлдөг гэж би боддог. Үлгэр, ном бол зүгээр цаг нөхцөөх, зугаацуулах биш амьдралыг ойлгох ойлголтыг суулгах зугаатай, хөгжилтэй, сэтгэл хөдөлгөсөн арга юм. Энэ төслийн үр дүнд илүү олон эцэг эхчүүд хүүхдэдээ ном, үлгэрийг уншиж, жүжиглэж, дүрсэлж ярьж өгдөг, ярилцдаг болоосой гэж хүсч байна.

Миний хувьд хүүхдийн зурагт ном бол зөвхөн багачуудад зориулсан биш томчууд бид ч гэсэн өөрсдийн үнэт зүйлсийг олж харч дахин сэргээх ид шидтэй гэдэгт итгэдэг.